要喺香港嘅綜藝節目度見到黎明（Leon），相信機會都幾細，不過大陸節目就唔同講法，最近Leon就為節目《國家寶藏》第二季擔任嘉賓。節目中Leon除咗介紹寶物外，仲會以老版「乾隆」造型出現添。

Leon今次上嘅節目，其實係大陸一個文博探索節目，由大陸演員張國立主持，而當晚嘉賓除咗Leon之外，仲有王菲，佢哋兩個以「國寶守護人」嘅身份登場，演繹呢啲國寶嘅「前世傳奇」同埋「今生故事」。

不過要講吸睛的話，就一定非Leon莫屬，事關《國》片今日出咗條預告片，片中Leon除咗會以西裝斯文Look出現外，仲會化身成老乾隆，去講述乾隆同國寶之間嘅故事，而Leon呢個老乾隆，仲好入戲咁用把低沉嘅聲音講出：「願我的國與家，如金甌，無一傷缺。」

嗱，Leon呢個乾隆Look型唔型就見仁見智，但相信囡囡見到，都未必會認得爸爸。

精選娛聞，喺晒《娛果》
http://fb.com/appledailyent