當年今日
關於我們

【囡囡輪廓激似周董】昆凌貼小周周彈琴片小指頭飛動彈得掂

蘋果日報 2015/11/06 06:00

蘋果昆凌周杰倫即時愛女輪廓小周周音樂細胞

周杰倫一向好保護家人,昆凌今年7月誕下愛女「小周周」時,周杰倫不欲愛女容貌曝光。不過,老婆昆凌早前喺愛女Hathaway就嚟出世100日時,就主動喺微博貼出愛女半邊臉照,相中只見Hathaway有長長眼睫毛、鼻骨都算高,應該係美人胚子。

周杰倫同昆凌日前幫Hathaway搞百日宴,「MRJ台灣官方」微博就貼出周杰倫嘅一家三口相,睇見小周周cute爆咬手指,昆凌都忍唔住輕吻B女頭頂,母愛盡現。

今日中午,昆凌再於網上po片留言:「3個多月的Hathaway潛能激發中~爸比小心囉!」片中見囡囡確係遺傳到爸爸嘅音樂細胞,按手機中嘅電子琴鍵嗰陣,有啲音樂感,亦都彈得好淡定,手指仔郁動時,亦似足彈琴嘅指法走位,當然囡囡未學過琴,對彈琴有咁嘅表現,確係叻叻豬,難怪o氹到現場嘅大人忍唔住笑。

片中雖然「小周周」Hathaway低頭玩緊,不過,唔少fans都覺得Hathaway個樣似爸爸周杰倫多啲,留言:「長得和杰倫小時候一模一樣,亦有網民讚Hathaway表示:「小公主好棒!」