邵氏影城今晚舉行第四屆amfAR慈善晚會，星光熠熠，楊紫瓊、崔始源、吳尊、松岡李那、何超瓊、關之琳等都有到場。

松岡早前被報道影到佢有新歡Eddie，呢位Eddie係余文樂好朋友嚟，仲係余文樂結婚嘅兄弟之一，今日松岡喺晚宴上話：「真係冇，唔係男朋友，係好朋友，我哋識咗5年。」知唔知男仔係咪鍾意佢？佢話：「唔知道，個日拍完戲好攰，想食宵夜，佢好nice出嚟陪我。」嘩，有埋行動咁實際即係追你啦？松崗即哈哈哈笑得好甜答：「唔知㗎。」佢話鍾意做運動嘅人，可以一齊做運動，但個男仔唔係對象。

何超瓊再次擔任晚宴榮譽主席，佢話以往晚宴可以籌到四、五百萬美金，希望今年都相若，佢又希望拍賣環節可以再籌多一百萬美金左右，如果啱心水自己都會競投，問到係投俾自己定爸爸？佢話：「個啲都係現代派，多數都係自己收藏。」

關之琳被問到會唔會投藝術品？佢話唔會揀雕塑，要好大地方先擺得落，但鍾意個啲畫就係天價，要欣賞會去藝術館睇。

精選娛聞，喺晒《娛果》
http://fb.com/appledailyent