議員同香港電台高層要懷疑政府受政治壓力干預香港電台編輯獨立，乃人在其位無可厚非，但佢哋冇需要一竹篙打一船人，將所有商業原則運作嘅報章雜誌電台電視通通一律講成政府喉舌。保飯碗還保飯碗，但係為乜無端端要抹黑市場呢？
利世民一向講事實，無錯港台唔少節目都有好高欣賞價值，但呢啲成就並唔代表一定要由公帑找數先至做得出。既然議員同香港電台高層都當正市場係洪水猛獸，利世民就畀個非謀利獨立模式大家參考下。
美國人對政府非常之唔信任，亦都唔贊成政府搞傳媒。雖然美國無官辦電台電視台，佢哋嘅NationalPublicRadio同PublicBoardcastService就可以靠捐款運作，而且製作出嚟嘅節目一啲都唔輸蝕。
利世民計過數，香港電台最貴嘅其實係電視部，佢哋一年開支大概2億。呢個數目包括近600個鐘頭節目，一個鐘頭成本30幾萬，就當佢同𠵱家嘅電視台拆帳，應該可以收番七成以上成本。至於電台方面，七個電台其實每個鐘頭嘅成本只不過3000蚊樓下。