【遲啲無得買】呼籲樂迷買碟 雞蛋蒸肉餅︰香港人要支持香港人!
閃靈樂隊何韻詩雞蛋蒸肉餅音樂節
四人女子組合雞蛋蒸肉餅,今日喺科學園為何韻詩主辦嘅《我們正在音樂節》擔任表演嘉賓,佢哋喺台上宣傳專輯,呼籲樂迷買碟:「香港人要支持香港人呀,如果唔係遲啲無得買。」最後送上喺雨傘運動期間寫嘅《榴槤乜乜乜》作結。
雞蛋蒸肉餅話音樂節已經第五日,心情依然有點緊張:「我哋夜晚幫阿菇(何韻詩)做樂手,好攰,不過都會盡力頂。」不過對於讓香港樂迷,有另類嘅音樂節體會,雞蛋蒸肉餅表示係好事,期待明年繼續:「搞一個音樂節,背後花嘅人力、物力好多,大家都做得好好。」
提到台灣樂隊閃靈疑因政冶問題未能來港演出,佢哋話:「都預咗,政府話無(政冶因素)呀嘛,你信唔信吖?音樂好闊,一定會有機會傳遞到。學阿菇呢個音樂節嘅主題咁話,我哋搞掂自己先,其他嘢唔好咁執著,知道嘅人就會知道,唔認識嘅根本就唔會了解。」
精選娛聞,喺晒《娛果》
http://fb.com/appledailyent
雞蛋蒸肉餅成員Soni (左起)、Soft 、Heihei 同Wing。