【楚雲聲】頭兩場賀賢玩晒 麥道朗幫佢奪「寶」（Cloudy）
蘋果日報 2019/12/03 20:55
賀賢神速寶Cloudy楚雲聲
神速寶上場第四試準走勢
翻查呢幾年國際騎師錦標賽嘅紀錄，總結都係七國咁亂，果然係襯番堆聯合國型男隆重登場。好多朋友話幸運大抽獎係主因，我就堅持係型男駕到，連馬仔都神魂癲倒，新合作擦出新火花。
假如我全年得一晚畀人約食飯，仲要附近枱枱都係型男，我嗰餐飯到底係特別chok、特別索，定特別失常，真係要食過先知啦！
所以騎師邀賽就唔係我嘅投注範圍啦！繼續傾向早少少收定錢，之後專心睇戲。今次鍾意賀賢同麥道朗呢口孖寶「怡昌福星」射「神速寶」。五班混戰，熱門唔穩，呢兩隻有權帶來驚喜。
第一場五班1200米，「怡昌福星」無績可尋，仲要轉場？點知佢拆咗個神經質眼罩，換上保心安面箍，呢幾課快工夫仲有顯著進步。呢場快馬唔多，4檔唔後，均速有態可以爭。
第二場五班1650米，「神速寶」上季五班同程識贏，一直遊住花園等機會，狀態保持得幾好。今場無乜快馬，靠追確係會蝕慢步速，但係8檔唔怕喺入面塞，泊到二疊就更好。