當年由方力申、鄭中基同梁漢文主持嘅《美女廚房》笑到觀眾肚痛，特別係小方一句驚天地泣鬼神嘅：「啲奶假0架！」到今時今日仍然成為美談。

大台最近播出新一輯，網民卻向主持林盛斌、蕭正楠同張振朗派嬲，話個節目悶到抽筋。咁其實都唔係好關佢哋三個事嘅……新一輯首集都仲有嘉賓農夫頂住，第二集更慘，被網民狠批節目沉悶，主持亂噏，製作水準遠遜前一輯。

小方今晚到中環出席腕錶發佈會，佢話：「第一集有捧場，自己都覺得好睇，睇報道見到有啲負面批評，其實播出第一集，唔好咁快批評，畀機會再睇吓先。當年我哋嗰套有鄭中基好好笑，因為佢係出名搞笑演員。」

對於有網民話新主持唔及舊嗰代賤嘴，小方硬撐：「都話第一集好難判斷，畀機會睇多幾集。」問到覺唔覺你哋賤嘴過依家三位主持？小方坦言：「我哋三個係好朋友，做《美女廚房》時有人質疑我嘅人格好衰格，其實係為咗節目效果先做得衰格啲，節目確實有啲影響，形象深入民心。」都係嘅……