被網友大讚係「忠國仁秀」嘅中國人壽（2628），喺四川地震發生後四日，就走出嚟話擔起晒四川嘅孤兒，助養佢哋直到18歲，令人動容，董事長楊超決定迅速利落，得人讚賞，呢個提議原來係有總理溫家寶提點。
噚日，《上海證券報》就報道咗楊超落呢個決定嘅來龍去脈。據講，楊超係通過網絡知道地震呢單嘢，他一睇到新聞，即刻打電話去四川省嘅分公司，點知電話打極唔通，而且連一個當地嘅同事都聯絡唔到，佢feel到出事，後嚟喺電視上見到溫總出動視察災情，令佢眼光光瞓唔着。

三日後親自送賠款

報道話，楊董第二日一早就成立抗震救災工作領導小組，佢亦唔假手於人，親自做組長，研究救災、協調及後勤保障三方面嘅工作，然後即日帶隊到四川救災。呢件事就見到楊董嘅應變及辦事能力有幾高及幾迅速。
楊董其後到重慶市兒童醫院，探望受傷學生，佢覺得做嘅嘢唔夠，應該可以做多啲，呢個時候，總理溫家寶探望孤兒時凝重嘅表情，呢幕經典場面，喺楊董腦裏面閃過，令佢諗起集團總裁萬峰同佢提過，可以透過「國壽慈善基金會」收養孤兒，楊董於是即安排有關事宜，同時就喺成都公佈助養孤兒至18歲呢個消息。
電郵：mailto:[email protected]