今日係愚人節，唔少藝人明星都喺網上「應節」，究竟邊句真？邊句係整蠱？邊張相係堅？邊張相係惡搞？咁就由大家自己估下啦﹗

屢傳變臉的台灣男星汪東城（大東），今日傍晚時份，喺微博貼咗張小朋友相，相中小朋友查實都幾似佢本人，不過大東就自爆呢個係佢五歲「囝囝」，佢仲拉埋已為人父嘅吳尊落水，之後大東仲無啦啦爆出「引退論」：「他五歲了，看著他天真無邪的眼神是我最大的驕傲；我累了，這個圈子；我想起了學生時代的夢是當個畫家！如今我不像我、連有孩子都不敢大聲說出來、謝謝吳吉尊給我勇氣！也希望大家可以祝福我跟我的家人及孩子！再見了大家，再見了娛樂圈！」哇？使唔使玩到咁大呀？

除咗大東外，性感女星張暖雅呢排都返內地登台，佢今日凌晨就喺微博分享咗張相，係一張驗孕棒圖片，而圖片顯示「有咗」，咁究竟張暖雅係咪有咗BB呢？抑或求其攞咗驗孕棒圖片嚟整蠱人呢？

另外，李雨陽都喺微博貼咗張黑白「結婚照」，佢同「新娘子」鼻貼鼻合照，狀甚甜蜜，李雨陽留言話：「今日是一個好日子，祝福我們吧～」當然真係有網民祝福佢哋婚姻美滿，亦有人表示「愚人節快樂」。