現年55歲嘅杜德偉（Alex）日前橫風橫雨之下，陪細24年嘅老婆到中環超市買餸，同行仲有Alex嘅助手，全程由杜太負責揀選新鮮生菜、蔬果同少量肉類，Alex就買咗麥包，睇嚟兩公婆平日都好注重健康飲食。

對App感新奇

戴黑超嘅Alex喺超市星味十足，初時都有跟喺老婆後面陪買餸，但冇幾耐佢就掛住同助手研究扮動物變面嘅手機app，似乎係助手教緊佢點樣玩，Alex即刻變身大細路覺得好新奇，表現得好有興趣，最後仲玩到黑超都除埋，對住手機忘我玩自拍，其間杜太問老公買呢啲好唔好？掛住玩嘅Alex只係hea答咗兩句，睇嚟佢返到屋企之後，應該會搵囝囝做model玩餐飽。
噚日父親節，即係初為人父嘅Alex第一個父親節，佢喺微博分享同八個月大囝囝Alex Junior溫馨合照，留言：「習慣每天醒來看見你甜美可愛的笑容，一切心滿意足，如果女孩們都是爸爸的前世情人，你這個小男孩便是我上輩子最好的手足！謝謝你來到我們家讓我有一個幸福的父親節。」
撰文：馮仁昭