余文樂今晚去圓方出席《一念無明》慈善首映，其他出席演員仲有金燕玲、方皓玟等人。一臉倦容嘅樂仔，佢話最近除咗《一念無明》嘅宣傳，《春嬌救志明》都要做宣傳，4月又要開新戲。

問樂仔係咪暫時冇機會放假？佢就苦笑話：「有得瞓都好好，喺飛機瞓唔到，啱啱去台灣做宣傳，一日做咗20幾個訪問，做到聲沙，最後幾個訪問差唔多開唔到聲。」

樂仔話呢排精神壓力都幾大，女友王棠云（Sarah）都有兩星期冇見面，不過有通電話。講到佢憑《一念無明》首度提名金像獎影帝，問佢有冇準備好戰衣？佢就話：「試咗衫，都冇乜緊張，未試過，可能去到先會緊張。」

問樂仔有冇諗定宣佈結果前，會喺鏡頭前擺個乜嘢樣？又會講乜嘢講辭？樂仔就話：「雖然未試過（提名），但都有睇過，都要諗下點避咗個尷尬位。」至於講辭，樂仔話自己未有真係咁有自信攞呢個獎，提名對劇組已有交代。

今晚王宗堯有去圓方睇首映，佢早前俾本報讀者影到同Super Girls成員李靜儀（Heidi）食飯，Heidi眼神似乎極冧佢，王宗堯話：「正常社交，拍拖係雙方，同對方識咗3年，冇諗拍拖。」有冇發展機會？王宗堯話正常人都可以拍拖，最重要唔係一腳踏兩船同埋感覺。不過，佢話o依家好多嘢要更加關心，好似金像獎同周日嘅特首選舉。

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。