花旗股市跌，㗎仔嗰邊又跌，港股昨日大幅裂口低開，之後恒指都冇力大幅反彈，咁都唔難理解，下禮拜期指就結算，淡友點會咁易俾好友反攻！
恒指跌落20520收市，唔見咗278點，成交就大增至679.7億，形勢真係唔係好盞，不過，50日線喺20259，升緊上嚟，睇嚟班好友都會頂實呢個位。
港股冇乜好消息炒作，個市點走都係要睇外圍，仲要求神拜佛人行唔好咁快有新嘅宏調措施。花旗嗰邊前晚低收，技術上仲要跌多少少先至會橫行，市場消息好混亂，美元同利率嘅走勢、伊朗局勢，全部都可以攞嚟做文章，昨日北韓又試射短程導彈，真係亂上加亂，孫子都講過，「亂而取之」，大戶又點會唔識得趁亂博懵？睇個勢短期內股市都會幾波動。

A股同B股俾格林斯潘唱跌咗，內地同胞股民好唔like，喺網上發炮轟炸格老，轉個頭，A股同B股都升番上嚟，你睇吓同胞們幾掂！不過，逆耳嘅忠言有一定參考價值，希望同胞們要諗諗格老嘅說話。
港股短線偏軟，炒股炒輪都要好小心選擇，唔係隨時會揩鋪勁嘅，強勢股當然係優先選擇，但係累積升幅太大，升勢又急嘅股票最好都係避開吓先。
恒生C輪7524：恒生（011）昨收108.30元，跌1巴仙，跌穿100日線，同5月11日嘅走勢差唔多，由上次「倒轉錘」反彈番上去，昨日又係「倒轉錘」，可以博吓短線反彈，睇111元，買番啲C輪7524。隻輪昨日收33仙，槓桿率32.8倍（有效11.9倍），正股升上111元，7524應該喺43仙樓上，正股跌穿107元止蝕。