政府硬推「送中」惡法，港人憤恨難當。陳琬琳（Bessie）是社運常客，曾多年參與「六四報哀音」，最遺憾是赴台升學而缺席2014年雨傘運動，傘運成為一代人傷痛，有份聯合在台港生支援的Bessie感受同一種無力，近年刻意或無意逃避社會大事。直至港人被迫「硬食」送中惡法，她有感必須再振作，跟一班中學校友合力發起反惡法聯署；曾冷待時事，今再踏街頭，「依家唔做，以後就會遲，甚至連個簽名都懶，咁真係只可以成為最後一次（反抗）。」

記者　周婷

2014年9月，正是Bessie赴台灣升學的第一個月，到埗不久，香港爆發雨傘運動，「嗰幾日完全冇瞓過覺，想即刻訂機票返香港」，遺憾是未能戰勝家人反對、老師勸告。她透露，台灣的老師意外地很關注傘運發展，當中有人聚集了幾位老師，一起來勸她勿衝動回港，「我當時係好嬲，有啲好cheap嘅諗法係『我自己地方嘅事，點解你哋要出聲？』」但靜下來深思，她明白老師的憂慮出於好意，「我哋頭半年類似要坐移民監，因為要申請居留證。」

傘運持續，Bessie連同台灣的香港留學生收集聯署簽名、分批組團返港支援，她坦言當時人不在港，但會時常關心香港新聞，「例如有啲戰友衝入政總被拉，當時未有咁多政治犯（受關注），會好擔心佢哋俾政府留難。」

雨傘運動持續81天後落幕，金鐘、旺角、銅鑼灣清場共拘捕數百人，當中不乏Bessie的好友。留學四年，她在每年寒暑假都會返港，每次只感覺城市更壓迫，「做咗咁多嘢，最終只可以妥協，激進少少的朋友面臨秋後算帳」，大家如一潭死水般暗淡不快，「有種感覺係想休息，想關注好自己身邊嘅事、個人嘅感覺先」，香港新聞仍然天天在看，感覺卻漸行漸遠，然後是刻意或無意地避談香港時事。Bessie承認：「係逃避。」

去年夏天，Bessie完成設計學位返港，未能預料的是親友得悉她「回家」的反應，「每一個朋友都同我講『點解要返嚟』長輩問『你返嚟做乜』」港人渴望出走，Bessie也透露返港後求職不順利，曾有一刻後悔，如當初決定留在台灣，要找到一份待遇好、受尊重的設計工作會較易。不過她仍然慶幸終於回到「自己地方」，直言：「講唔到母語係一件好抑鬱嘅事」，能夠盡情講四字真言、跟朋友見面聊天，足以教她無比開心，「係一種家嘅感覺。」

送中條例「殺到埋身」，激發大量港人「做啲嘢」的決心，Bessie跟母校保良局李城璧中學一班校友合力發起聯署，推出半小時就有50多人簽名，至今聯署總人數已超過600人，「我想做返少少嘢，同佢哋（政府）講我哋仲係好緊張呢個地方，你唔好以為我唔講嘢，就當我唔出聲，當我哋係啞嘅。」她笑言，在Facebook、IG連環出帖「鬧爆」建制派硬推修例時，很多朋友跟她說：「話以前嘅Bessie返番嚟啦。」

多位高官「出口術」指學界反送中聯署缺認受性，Bessie反擊：「高官無恥講大話，好似警察亂作集會人數，明明簽咗就係簽咗名，有聯署人嘅憤怒喺入面」，她又寄語港人此刻勿拘泥於抗爭方式，盼遍地開花的學界聯署可呼籲更多人上街，「好多人認為遊行係『圍威喂』，行完就返屋企，但我覺得人數係重要，遊行有幾多人係事實，唔會因為你行完返咗屋企，就好似冇事發生過。」

昔日新聞：電視辯論互叫熄咪 曾：你係撕裂2.0 林鄭：會順應民意辭職
相關新聞：【不斷更新】全港大中小學學界聯署「反送中」

【引渡惡法●懶人包】大律師公會逐點K.O.政府修例理由
【引渡惡法●懶人包】一文睇晒立會法律顧問7點質疑修例

民陣6.9反惡法遊行

日期：6月9日（日）
集合地點：維園草地
時間：下午2時30分集合、3時正起步
遊行路線：維園草地遊行至金鐘添美道立法會
（資料來源：民陣）

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX