【除名顯決心?】避提麥明詩怕負評 林作一提鄭俊弘即刻嘩嘩聲
抽水保良局鄭俊弘猷亨猷君麥明詩林作四太梁安琪首席男歌手
林作獲正式除名,唔再係執業大律師,佢話要顯示自己對其他行業發展嘅決心。
保良局董事會就職聯歡晚宴今晚喺灣仔舉行,而喺今朝獲法庭頒令,允許佢喺大律師名冊中除名嘅林作(新聞連結: http://bit.ly/2p1todP )都有現身。被問到係咪除名一身輕?林作話:「本來想低調,但法律組朋友好盡責,前一晚11點已打畀我,我自己講清楚好啲,畀大家睇到我對其他行業發展係幾有決心。港人想像力太狹窄,覺得要有大律師個名喺度,所以我話畀人聽,今次係決心出嚟撈,除名手續只係做啲paper work,他日可以再掛牌,唔算犧牲,最想教書、幕前。(想撈乜?)暫時未有本。」問到麥明詩係咪好支持?林作話:「唉,唔講喇!費事惹負評。」
負評?咦?林作係咪講緊大台「首席男歌手」鄭俊弘單負評事件?林作聞言即刻「嘩嘩嘩嘩嘩嘩」咁嘩咗6聲:「唔評論喇!(唔撐咩?)撐!好朋友。」問覺唔覺得麥明詩抽水(新聞連結: http://bit.ly/2np2bBS )先?林作話:「講真,成件事都係佢哋兩個人(鄭俊弘同何雁詩)嘅事,呢件新聞主角我唔識,唔畀意見同評論啦!(咁媽咪支持工作嗎?)佢喺內地打電話畀我同我打氣,佢係一個幾好嘅母親。」
另外,同場嘅四太梁安琪,被問到兒子猷亨做總理係咪覺得好成功,佢話:「成功唔算,不過大個仔咗,又成熟咗,對公事處事認真,為公益應該咁做,一日保良一世保良,由佢接棒何生會好開心,何生對善事百分百支持。佢(猷亨)要多努力多聽意見。」
講到猷君上海創業,四太:「佢忙啲,希望佢有番事業成功,為慈善努力。」有冇寄語畀猷君?四太:「努力學習。」四太再講到細女超欣就嚟入大學,但未選科,佢話個女數學OK,應讀理科。問係咪同哥哥一樣係數學天才?四太話:「唔係,佢自己鍾意啦!佢哋工作有壓力,我都有。」問係咪何生仔女各有壓力,四太話其實做任何人嘅子女都會有壓力。講到超盈半年賺2,000萬,四太:「吓?我都唔清楚。(有冇請食飯?)未請喎。(會唔會獎勵佢?)佢搵到錢應該佢孝順我㗎嘛!」咁四太想要啲咩禮物?「要佢繼續努力。」