陳積榮獲女友支持對抗末期肺癌 搬入梅窩靜養試做細胞免疫治療
蘋果日報 2020/12/19 14:39
陳積榮Jeff末期肺癌
陳積榮獲女友支持，積極對抗末期肺癌。（影片截圖）
現年37歲的前無綫藝員陳積榮（Jeff）不煙不酒，今年7月卻驚聞噩耗，證實患上末期肺癌，醫生指最壞情況只剩低半年命。幸運地，Jeff得到家人、女友及身邊朋友支持，並獲有心人籌錢醫病，他早前拍片放上YouTube透露近況，見他精神不俗，經常到佐敦谷公園曬太陽、赤腳行草地，又去馬灣放空，每日練氣功，拼命打贏這場杖。
片段中，Jeff透露已完成電療療程，但每日都要食標靶藥，不能曝曬太陽，故需要穿着長袖衫褲出一身汗，「真係好耐冇出過汗，我希望每日都拍片嚟鞭策自己，每日做運動，而家健康情況好啲，就嚟草地行吓chill吓，將人嘅毒氣毒素由腳排走，同吸收大自然嘅氣，咩病都冇啦！」他十分享受在草地上「碌來碌去」的感覺，透露自己練習瑜伽外，還有學八段錦和郭林氣功，希望腰患盡快痊癒，笑着說：「真係好正，原來呢個世界係咁正，真係要好好感受一下。」而去馬灣當日，女朋友更一邊工作，一邊陪住Jeff，難怪心情靚到爆。
《蘋果》今日致電Jeff，問到健康情況？他笑說：「算係幾好啦，冇乜話壞咗，但又冇100%好似以前咁，因為背脊仲有少少痛，但都肥番1、2磅。」疫情關係，他表示仍未作第二次詳細檢查，預計要到明年1月中，現在他準備跟患上罕見鼻咽腺樣囊性癌的李明蔚一樣，試做細胞免疫治療，他續說：「其實都幾貴，因為要4、50萬，我哋都考慮咗好耐，但聽講李明蔚做完第一次效果都唔錯，上星期我都去咗抽血做啲test，嚟緊都可能會試。雖然香港唔普及，但日本、台灣同歐洲都興，唔知係咪真係咁勁？！」
Jeff現在已搬離市區，入到梅窩居住，笑言自己已成為「梅窩宣傳大使」：「我成日推介人入去玩同郊遊，呢度空氣真係好啲，我都拍片記錄低，但剪片需要時間，早排又懶咗啲，遲啲整理好會再放片上網。」
陳積榮經常都會到公園草地吸收大自然的氣。（影片截圖）
由於每日要服食標靶藥，所以不能夠曝曬太陽。（影片截圖）
陳積榮最近精神轉好，可以自己駕車出外。（影片截圖）
Jeff的女朋友亦有出鏡，努力埋頭苦幹工作。（影片截圖）
陳積榮今年8月拍片，公開自己不幸患上末期肺癌。（影片截圖）
陳積榮感激家人、女朋友和朋友支持。（影片截圖）
孫慧雪等一班好友亦有幫Jeff籌醫藥費。（影片截圖）
-----------------------------
《蘋果》英文版免費試睇：了解更多