黃美棋同知名攝影師劉翁（Sunny）噚日喺觀塘為ViuTV嘅真人騷《攝·太帥》宣傅，Dear Jane為決賽擔任客席評判。

黃美棋話男友鍾健威（Ray）好鍾意影相，所以自己做呢個節目嗰陣都成日向Sunny偷師：「我學到好多嘢，o依家教返佢（Ray）都得。Ray聽到有呢個節目都覺得好新鮮，仲問點解我唔叫佢參加。平時我哋都有互影，不過多數佢影我，因為我專影佢影到好核突，反哂眼嗰啲。」問到男友有冇幫佢影過啲水著、性感尺度大啲嘅相私藏？黃美棋話：「唔會啦。」在旁嘅Sunny即笑謂好想太太幫佢影性感相。

Sunny透露節目將於7月出街，各位參賽者都必須要過五關斬六將，佢話：「呢4個入到決賽嘅都好有實力，佢哋嚟緊會幫歌手朋友影唱片封套。其實成個節目最難係忍笑，我同美棋真係忍得好辛苦。」黃美棋話：「試過有次叫佢哋影寫真，個女仔係著住古裝，紫霞仙子嘅造型，但係佢哋叫個女仔拎住兩個水樽影相，搞咩呀？」Sunny話自己唔會鬧啲參賽者：「做嚴父唔work架啦，佢哋犯嘅錯，我都犯過。我自己入行都15、6年，好多遺忘嘅熱情喺佢哋身上搵返。」