王宗堯、鄧健泓同老婆石詠莉同導演吳兆麟，今日喺深水埗出席網劇演員見面會，訪問時，王宗堯口快快咁話：「公司好旺，係咁生仔，杏兒吖嘛！」胡杏兒真係有咗？王宗堯表示：「傳話有吖嘛，我冇去証實呀！」鄧健泓望住王宗堯話：「呢啲咪瀨嘢位囉！」王宗堯笑指：「呢啲係灰色地帶，都唔係我哋公司，關我哋咩事吖！如果真係嘅，就恭喜佢，恭喜定先。」

呢個網劇係講鄧健泓同王宗堯飾演兩兄弟，同住一間公屋去爭一間房，鄧健泓話：「其實背後嘅訊息好可悲，因為我哋本身應該有嘅權利同空間，我哋竟然要好努力去爭奪同競爭先至有，不過唔緊要，香港人打不死。」以前有冇住過公屋？石詠莉話：「住200呎地方，細之餘，環境差，每日都被蚊針，我又住過船，因為我係水上人。」

鄧健泓表示有諗過移民：「馬來西亞、台灣、新加坡、泰國，我哋都有諗過，周圍啲樓都平過香港。」如果將來有小朋友呢？鄧健泓指當然係移咗民先生小朋友，「o依家儲錢，我哋諗過馬來西亞，但要做定功課。」當初由台灣回港嘅王宗堯，就唔打算返台灣，因為台灣嘅經濟仲差過香港：「我有諗過離開香港，但其實好多地方仲差過香港。」

石詠莉表示現時全球經濟都差，只係因為香港嘅物價指數太過份：「最近鼻敏感發作，香港嘅空氣好差，敏感到噚日耳水不平衡，耳仔塞埋，o依家好番啲啲。」喺劇中，鄧健泓同石詠莉飾演兩老婆，石詠莉笑住話：「如果下次再合作，我寧願做仇人，因為可以嗌交。」鄧健泓話：「係呀，我哋一年只係嗌3、4次。」

精選娛聞，喺晒《娛果》
http://fb.com/appledailyent