當年今日

陸觀豪好嘢 - 左丁山

蘋果日報 2002/09/29 00:00


賓架講嘢,私底下就會幾坦白,對住記者就樣樣小心,大打官腔。星期三下午左丁山瞌眼瞓,合埋對眼聽電台,恒生銀行賓架陸真好嘢,語語中的,以佢嘅地位,本來可以講幾句門面話,但佢講真心話,左丁山聽完,當堂精神晒。
當日股市隨外圍大跌,但下午傳出政府推出穩定樓價措施,地產股股價反彈,大市跌幅收窄。記者追住陸觀豪攞反應,佢嘅標準公關答案本可以如此:「樓價持續低殘,大家都唔希望見到,政府如果推出新措施,有助穩定樓市,相信合乎市民嘅願望。」答咗等於冇答,過得關啦。但賓架陸居然講:「PegRate唔可以變,其他價格好似工資、樓價都要向下調整,如果又唔畀跌,政府要托住,對市場係一個混亂訊息」(並非原文照錄,只憑記憶寫出嚟。如有錯漏,唔關賓架陸嘅事)。
賓架陸做研究出身,懂得經濟理論,知道在滙率不准變嘅制限(constraint)條件下,香港要維持國際競爭力,以美元計算,工資與地價樓價一定要跌,冇得傾。偏偏特區政府怕痕又怕痛,既然唔准郁滙率,但又要頂住樓價,最荒謬嘅就係只係要減工資,即係由所有打工仔承受經濟調整之苦,失業率有乜辦法唔高吖。
陸觀豪乃真君子,快言快語,講出市場訊息混亂嘅問題;梁錦松唔係唔識,只不過係冇陸觀豪咁勇敢面對現實啫。