年尾就係區議會選舉，因此大家今年肯定會不斷發現，地區上出現好多光怪陸離嘅事，平日唔出現嘅人，會突然出現；出現咗一陣嘅人，又會因為某啲原因突然消失；某啲地區問題，又會突然解決咗喎，而朝早返工時間，突然會有人向你噓寒問暖㗎，總之千奇百怪，買定花生剝到年尾就啱㗎喇。
而喺區選戰場，建制派永遠未選先佔上風，因為佢哋嘅資源，真係多到你唔信，甚至幾乎可以區區派人出選，當然只可以砌泛民為目標，唔可以因為互相廝殺而益咗泛民，所以協調工作搞到大家牙血都出埋。好似中產區咁吖，查實都有分「貴賤」，主要由自由黨同新民黨分別討好大老闆同窮中產。
查實自由黨向來俾人印象，都係富貴黨，好有有錢佬、大老闆、商家佬嘅感覺，所以喺分區上，無論佢哋自己抑或幕後領軍嘅西環，都會支持佢哋出戰貴格啲嘅選區，例如山頂、赤柱、九龍塘，希望同聲同氣下，場仗易打啲吖！

至於大家口中嘅「窮中產」，其實就比較多由新民黨負責，難怪唔少大型屋苑例如太古城同康怡等，都係佢哋目標佔據地。雖然呢啲窮中產區佔多咋喎，但係由於唔少窮中產，都係泛民嘅支持者，所以新民黨就算派人落場，都唔易過關。
基層區就冇走雞，通常係由民建聯同工聯會呢兩位「親生仔」分佔，唔少工聯會成員大呻獲自恃最大黨嘅民建聯「明益」，將泛民固有票倉、難以攻陷嘅基層區「送畀」佢哋，但一啲新公屋區，民建聯就搶住要爭。花生友同唔少建制派討論民建聯嘅霸氣時，唔少人點頭稱是，大多數係敢怒不敢言！

花生友