【新增影片】

丁冠豪在周日(2日)開鑼戰，進行升任練馬師後處男第一擊，唔緊張就假，這天(1日)作戰前夕，丁仔亦好積極，一早在場督操，其中他對第六場四班1400米的「快樂寶貝」尤其重視。

丁冠豪唔止自己吼實「快樂寶貝」，佢亦同此駒的騎師梁家俊一齊睇馬，其實「快樂寶貝」今朝只由助手內圈快踱，並非家俊仔主操，但家俊仔仍相當關注馬兒的進度，當「快樂寶貝」操完準備步返馬房時，騎練一齊在閘口觀看該駒一舉一動，之後更邊行邊傾，擺明研究搏殺大計，爭勝決心甚大。

「快樂寶貝」加盟丁廐後備戰如火如荼，日前泥地大閘，入閘時有點扭計，但起步後走勢甚佳，力壓新星「巴基之友」跑第三，而勝出的赫然是高達123分的克蘭芝一哩賽冠軍「川河尊駒」，是一組高水準試閘。反映7歲的「快樂寶貝」依然具戰鬥力，加上此駒今仗降入四班作賽，對手遠比之前弱，機會在眼前，難怪丁冠豪咁緊張了。