譚凱琪(Zoie)、梁嘉琪同何廣沛今日到大圍參與聖誕活動，Zoie同何廣沛同樣喺拍劇中度過聖誕，Zoie特別整咗啲Cup Cake帶畀劇組嘅同事食。今年收到聖誕禮物，佢就話以食為主，當中有份禮物係一位相識多年嘅朋友親手製作相集，問到男友送咗咩？佢笑住話：「送咗個心，冇特別交換禮物，都係簡單食一餐飯，因為我自己唔識揀禮物，所以都係平時見到啱對方嘅嘢先至買。」Zoie透露咗一件慘痛經歷，以前試過一段時間自己鍾意bling bling物品，所以送了一條bling bling領呔給男友，可惜對方冇戴仲嫌老土，佢話：「o依家見到bling bling都憎。」

何廣沛難得boxing day放假，一心想返屋企陪家人食飯，點知父母同家姐都有約，講到可能屋企人知佢有約先自己搵節目，佢話呢個係美麗嘅誤會，問到做咩唔約朱晨麗食飯？佢話：「臨時約人好肉酸，正常都已經約咗朋友，等遲啲得閒先再約佢食飯，慶祝之前自己攞獎。」佢指近期兩個工作都忙，留待一月先食飯慶祝。另外二月份接拍新劇，預計要騷肌上陣，近日開始密密操弗，希望將腹部朱古力下面嘅脂肪減走。

精選娛聞，喺晒《娛果》
http://fb.com/appledailyent