林嘉欣前年10月喺加拿大為廣告導演老公袁劍偉生咗個女Kayla，之後佢專注家庭生活同湊女。舊年嘉欣返港定居，佢有漏口風話諗緊追唔追多個小朋友，噚日嘉欣到尖東為香港國際電影節主辦嘅賽馬會電影學堂擔任大使，着住鬆身厚褸同平底鞋嘅佢，仲要遮晒前腹，面容又有啲水腫，即刻被懷疑懷第二胎。

家庭為重

被追問係咪懷有龍B，嘉欣話：「唔係，家冇。」佢話因為最近忙緊演舞台劇《野豬》，唔可以冷親，所以要着夠衫。不過講到生唔生，嘉欣好坦白話順其自然唔抗拒，兼且近兩年佢推晒所有內地拍攝嘅電影，免得操勞之餘，又可以多啲時間湊女，嘉欣話：「BB第一年好需要媽咪喺身邊，老公亦好尊重我嘅決定，我會以屋企行先。」
嘉欣話囡囡家歲幾，開始識爬識行，理解能力幾強。嘉欣話心思思想追多個，但就冇計劃生幾多個，不過傳統觀念生完冇耐嘅婦女會易啲再懷孕，嘉欣聽到只係支吾以對：「係咩？」嘉欣首年喺香港過年派利是，同時幫囡囡𢭃利是，佢話會幫佢儲起，留番將來先用。