【新增內容】

韓國樂隊CNBLUE嘅28歲成員鄭容和，今年1月被爆涉享特權入慶熙大學，隨後鄭容和就事件道歉並表示會退學，更宣佈將於下周一入伍，望當兵洗底。而鄭容和今、明兩日喺首爾高麗大學舉行入伍前嘅演唱會，最後一次見粉絲及吸金，雖然演唱會於韓國時間今晚8點先舉行，但已經有粉絲一早喺現場等候。

不過今日就有報道指，鄭容和因涉享特權一事被警方調查，調查結果今日出爐，而警方以「涉妨礙公務罪名」要求檢方起訴鄭容和、鄭容和嘅經理人以及涉案嘅慶熙大學教授，有指鄭容和可能因此延遲入伍。

據首爾地方警署智能犯罪調查隊透露：「鄭容和從未參加面試，卻可以280分(300分滿分)嘅成績成功入學，雖然鄭容和方面主張有單獨與系主任見面進行面試，但喺調查過程中卻冇發現兩人見過面嘅紀錄。」

而鄭容和所屬嘅FNC事務所就強調，鄭容和將會如期於下周一入伍，並指警方嘅調查結果有歪曲嘅部分，對此結果大感可惜。

鄭容和之後喺Instagram發表長文表示，到現時為止每日都好沉重，並指因為事件調查中，所以冇一開始就企出嚟向大家解釋：「正如之前公佈嘅道歉文所寫，如果我有違反規則，我會為事件負責任及反省，但因為太多人對事件有誤解，所以想在此解釋。」續指：「據我所知實用音樂學科博士課程嘅面試，可由教授自行決定。我入學前喺工作室與教授見過面，我亦將我創作嘅歌曲、公開過嘅作品當成面試功課，即席播畀教授聽，亦有向教授提到自己未來嘅計劃等內容。」

鄭容和又指：「我以為只需接受教授嘅面試就可以入學，而冇認真睇到入學申請須知，的確係我嘅過失，而我亦為事件反省中。」又稱自己以前受訪時已經多次表示有讀博士嘅打算，強調自己唔係想延遲服兵役先打算讀博士，亦表示自己從未有逃兵役嘅想法，表示身為韓國國民一定會履行國防義務。鄭容和於發文中再次就事件道歉，表示會誠實接受餘下嘅調查，並向檢方解釋被歪曲嘅部分，又希望之後唔會有歪曲嘅報道。

更多韓流，喺晒《娛果》
http://fb.com/appledailyent