前線新星爆發! 法國打少個K.O.英格蘭
法國英格蘭保羅普巴哈利卡尼馬克龍捷比亞迪利阿里奧士文尼迪比利文翠珊基利安麥巴比
【新增動新聞】
法國新浪潮大爆發!周二友賽,法國走出上仗世盃外不敵瑞典嘅陰霾,憑烏姆迪迪、迪積比爾薛迪比同奧士文尼迪比利各入一粒,主場3:2擊敗哈利卡尼梅開二度嘅英格蘭,其中迪比利、保羅普巴同基利安麥巴比等年輕前線球員活力十足,前途無可限量!
雙方相比上場正式賽事都有作出變動,其中法國收起基沙文,英格蘭亦有右閘捷比亞上演國家隊處子戰,而法國總統馬克龍同英國首相文翠珊都係今場座上客。上場世盃外僅於補時逼和蘇格蘭2:2嘅英格蘭,今場9分鐘就有好開始,史達寧後踭傳予左路嘅賴恩貝特蘭,後者地波傳中造就卡尼輕鬆撞入,為「三獅」領先1:0。不過,法國22分鐘迅速扳平,湯馬士林馬開出罰球,基奧特頭槌雖然俾門將湯希頓飛身救出,仲有巴塞隆拿守將烏姆迪迪趕到,射入個人國際賽處子入球扳平;佢哋喺43分鐘再下一城,迪比利禁區內巧妙扣過飛鏟嘅史東斯起腳,湯希頓再次擋出,但有迪積比爾薛迪比趕到補中,為法國半場反先2:1。
換邊後僅一分鐘,法國守將華拉尼被指禁區內從後絆跌迪利阿里,球證直指12碼並打算出示黃牌,從慢鏡所見就算雙方有接觸都只係相當輕微,但球證經場邊視像裁判「提水」後出示紅牌驅逐華拉尼出場,卡尼操刀12碼射破熱刺隊友洛里斯大門,為英格蘭扳平2:2。不過,10人應戰嘅法國喺78分鐘鎖定勝局,麥巴比禁區內橫傳,迪比利勁射地波省中加利卡希爾,遠柱收死希頓,為法國險勝3:2完場。
↓法國vs英格蘭精華↓
http://bit.ly/2s82Cj2