英超賽會禮拜一宣佈，星期六場曼市打吡會由卡頓保執法。卡頓保近年係英超第一球證，甚至可以話係歐洲首席名哨，逢係大波都係搵佢吹，例如今夏嘅歐國盃決賽同埋上屆歐聯決賽。睇番近年數據，卡頓保似乎較利主場嘅曼聯，上季卡頓保吹過五場曼聯比賽，紅魔保持不敗，包括英足盃決賽，曼聯贏水晶宮2:1捧盃。反而卡頓保上季執法嘅四場曼城比賽入面，藍月僅一勝一和兩負。卡頓保近兩季都吹過兩場曼市打吡，分別係上季兩隊踢成0:0同埋前季曼聯主場贏4:2。另外，考慮到哥迪奧拿同摩連奴本身有牙齒印，英國警方擔心兩邊球迷更易發生衝突，所以到時會安排400名警員戒備，維持秩序。

耶耶球迷撐曼聯

曼城中場耶耶托尼（小圖）被哥迪奧拿打入冷宮，睇嚟曼市打吡都係睇波多，但佢經理人最近好多嘢講。前排佢經理人施盧卡話耶耶係好專業嘅，好樂意留喺曼城直至完約，最近佢就發炮轟哥帥咁對耶耶，等於得罪成個非洲嘅球迷：「因為哥迪奧拿嘅決定，曼城將會失去數以百萬計嘅非洲球迷，佢哋會轉為支持對手曼聯。家陣喺非洲已經好少人喺電視睇曼城比賽。」此外，有英媒話哥迪奧拿唔太滿意曼城班閘位球員，叫沙格拿、薩巴列達同基捷基治呢季好好證明自己，否則下個夏天清走佢哋。