【勢入豪門】最好波星二代 原來係麥當娜養子？
蘋果日報 2017/06/21 10:08
麥當娜葡超賓菲加馬拉維星二代David Banda歐洲足球
麥當娜養子David，隨時係新一代球星？
大球會吼實球壇「星二代」就聽得多，而家打埋樂壇「星二代」主意？美國樂壇天后麥當娜（Madonna）2006年喺非洲國家馬拉維領養當時一歲半嘅小男孩David Banda，轉眼間已經11歲啦，更加充滿足球天份，喺麥當娜社交網站都不時見到佢嘅踢波同捧盃相，如今更有機會加盟葡超勁旅賓菲加！
目前效力紐約Downtown United U14梯隊嘅David，近日喺葡萄牙跟隨賓菲加U12試腳，表現備受好評，隨時有望簽下一紙青年軍合約。據報麥當娜為咗陪育愛兒成才，甚至不惜舉家由紐約遷往里斯本，豪花500萬鎊喺里斯本鄉郊置業，以及將David送入每年學費高達3萬鎊嘅貴族學校，呢位58歲「辣媽」亦「身體力行」，月初上載一張身穿賓菲加球衣嘅自拍照，唔知咁樣幫唔幫到囝囝加分呢？
Daivd（後排右三）喺紐約Downtown United表現出色。
麥當娜上月底喺賓菲加球場留影。