病人話聲有力，面色佳，但近半年胃口大失，越來越疲勞，瘦了5公斤。
我平淡道：有無檢查（絕症）？
病人：檢查晒咩事都冇，就係唔知有咩怪病。

我鬆一口氣，繼續了解病情！
患者沒有工作，休息充足，有適當運動，過去身體佳。把脈後，隨了中氣極虛，並無特別！

我繼續問：有冇食咩藥物或者去過邊度旅行？
病人：冇，咩藥都唔使食，只係留喺屋企。
我：咁保健品呢？
病人：冇，我唔食補品……但每日都有一粒蘆薈丸，好細粒架咋！
我：做咩無端端食蘆薈丸！？
病人：通便囉！
我：但你話大便無問題，通暢每日都有，一條條好靚！
病人：係呀，日日食就好好囉，唔食就唔得。

最後叮囑病人停食蘆薈丸，再開一些溫中通便藥，幾天內症狀精神胃口都明顯改善。

兩周後，病人與家人同來。
女家屬：其實蘆薈丸有咩問題，點解唔食得？
我：蘆薈丸無問題，只係唔係咁多人可以長期食而頂到！（註：蘆薈苦寒通便，易傷脾胃和陽氣）
女家屬：但我啲同事，日日食都無事！
我稍深呼吸：其他人情況，好難咁討論，其實兩個禮拜前你都唔會同人講你爸爸食蘆薈丸唔舒服。

大部份食物，即使不熟悉，只是稍嚐，通常無事；但若長期頻食，最好先多一點認識。

紅菜頭、蕃薯是常見的食物，間中食不會出現大問題；惟短期內重複食用，累積偏性，就會引起問題！

食品都有多重屬性，經常有人驚訝問，「紅菜頭唔係補血咩」、「蕃薯唔係好㗎咩」？補血和好不好，與寒溫並無衝突，可以又補血又涼，通便而偏溫。紅菜頭和蕃薯都比較礙胃，本身有胃腹脹或痛症者宜少食。

食物通常無問題，但因為喜歡，就容易過量，把本來身體可以化解的微偏性，累積成為巨大偏性，引起疾病。

撰文：註冊中醫師陳俊傑

《蘋果》沙士15周年系列網站，正式登場：
https://hk.feature.appledaily.com/sars15/