提起「政界方中信」，好多人第一個諗到嘅可能係自由黨黨魁鍾國斌，但查實佢只係「政界方中信2.0」，皆因民主黨前立法會議員、兼今屆資訊科技界選委「票王」單仲偕（單雞），出道無耐已經畀人話佢似方中信咯，尤其那些年舊相中幾咁憂鬱嘅眼神，「政界方中信1.0」非佢莫屬。

現年57歲嘅單雞，3、4歲嗰陣都幾有肉地，相當得意，到咗7、8歲嗰陣，眉宇間已經隱含憂鬱嘅味道，查實一頭濃密短髮，粗眉、大眼，同依家分別唔算大，當時有啲似公仔Monchhichi，點估到大個咗嘅佢多咗陣方中信嘅男人味？

單雞家陣住喺葵青區嘅華景山莊，而查實佢由細到大，都喺呢區打滾，細個時係舊葵涌邨居民，中學就讀於葵青區嘅名校聖公會林護紀念中學。而童年時嘅玩樂日子，大家點會咁易忘記？單雞都同八方想當年，話對當年成日同隔籬屋啲小朋友一齊玩，好似打波子、煲蠟等美好時光念念不忘，但隨著大家年紀越嚟越大、加上葵涌邨90年代拆卸重建，佢同呢班兒時玩伴冇再聯絡咯。

佢亦指那些年唔似依家咁，週圍都係集團式超市，嗰陣時買米係要去米舖嘅，買完之後會有人送到上樓，跟住就將啲米放入米缸，雖則話就話有人送貨，但單雞話不時都會幫阿媽抬米返屋企，認真乖仔，其中一張舊相見佢左手放喺一個寫住「東莞良田」嘅容器上面，嗰個就係一個米缸嘞！

生於斯、長於斯，佢後來又喺葵青區做區議員，成為從政嘅起步點，確實同呢區結下不解緣，佢話久唔久都仲有啲舊街坊搵佢幫手解決地區問題，同林鄭想搶嘅人才一樣，相信都係錢買唔到嘅。