林芊妤（Coffee）今日去到科學園參加瑜伽活動，佢係第一次喺香港戶外教授瑜伽，連大隻男友Weng Chak都跟埋嚟學，Coffee今朝一早去教完班再嚟參加活動，佢表示逢周六、日主要休息唔會開班，問佢係咪用嚟陪男友？佢笑住話：「唔係，係因為有啲活動出席，同埋平時教班攰。」男友得知今日喺戶外做瑜伽，兼且係做伸展動作，所以都嚟参加。

Coffee笑指男友筋骨硬，而平日兩人在家都甚少做瑜伽，佢話：「做嗰行厭嗰行，教完班已經好攰，加上我同佢程度差太遠。之前都想男朋友識瑜伽，可以大家傾，但之後發覺做瑜伽叻嘅男仔都怪怪哋，不過佢都好努力學。」

另外，提到日前出席蔡慧欣婚宴，拋花球時候，賓客都怕醜縮埋一邊，佢就帶大家湧躍參與，但抛嗰一刻Coffee就縮埋，佢笑擔心接咗嫁唔出會弊，講到係咪已經認定男友為結婚對象，Coffee指未到最後都唔知，問到係咪唔恨嫁？Coffee話：「完全唔恨，今年先28歲，我諗住32先嫁，仲有4年。」