澳門賭業中人講到當地發展天上有、地下無咁巴閉，可能都係表面風光。勞永樂醫生噚日應邀去澳門，向酒店大廚講解預防傳染病同處理食物守則，點知搭船去到澳門，當地入境人員話電腦紀錄顯示佢不能入境，要搭船返香港。
勞醫生強調，佢今次過澳門只係主持衞生講座，搞咗大半個鐘頭先獲放行。佢噚晚返香港後同八方講，今次係首次去澳門被入境人員留難，估計同佢係社民連副主席有關，因為之前長毛去過澳門示威，加上澳門民主派議員吳國昌日前拜訪過社民連，懷疑澳門當局有心打壓，將社民連列入黑名單，佢會去信鏵哥投訴。
社民連秘書長陶君行話，勞醫生係社運初哥，可能唔習慣呢啲遭遇，「我去澳門多數都要企一陣先放行，唔係去示威就冇問題㗎嘞。」