今日喺尖沙嘴海利公館舉行嘅「環亞美神大賽」，率先喺下晝舉行面試，大會表示今日約有40位女仔去面試，最後會選出12位入圍者。大會指定每位面試者都要統一着白色衫，入圍人士下星期就會拍硬照，大會又安排咗何紫綸教佢哋catwalk、Sunny Wong教佢哋跳舞、著名時裝設計師丘雪祺教佢哋形象等。

當日比較突出嘅，可算係3號參加者陳妙琪，佢表示自己好鍾意K-Pop，更以跳舞作才藝表演，不過跳得有啲hea，而佢表演期間，音樂仲出咗問題，佢唔知點做定咗格，何紫綸叫佢不如清唱幾句，最後佢唱咗首國語歌，不過唔係幾聽得出唱乜。佢仲同評判講，希望透過今次嘅比賽，發展到演藝事業。

至於20號嘅李浩宜，一出場就好激動，喊晒咁話自己「真係好鍾意唱歌，但係我搵唔到唱片公司……」，佢仲話試過自資出唱片。李浩宜面試時表演唱《愛與痛的邊緣》，唱到七情上面咁，不過佢就話自己好醜，因為喊，仲話自己心裏有團火，所以要自己爭取。李浩宜仲講到，如果俾佢贏到今次比賽，會用筆錢嚟出碟。有評判問佢點解唔直接參加歌唱比賽，佢話參加過但冇攞獎，而今次參賽，就希望自己真係可以好似大會主題咁講，由素人變女神，所以去面試連妝都冇化。