當今立法會最資深嘅議員，就係民主黨嘅超級議員涂謹申，阿涂喺91年以28歲之齡，成為當時歷來最年輕嘅議員，直至今日足足做咗27年議員，但如果要講到議會嘅淵源，阿涂就未必夠呢次八方相當年嘅主角，勞工及福利局政治助理馮興禮（Henry）咁深啦。

吓，去年以30歲之齡加入政府嘅Henry，年紀輕輕邊有可能有咁深厚議會淵源？如果大家知道佢爹哋係邊位，就唔會驚奇嘞！Henry加入政府都有大半年，八方不時都會喺立法會撞到佢，但佢早喺差不多廿年前就同議會結下不解緣，因為佢爸爸馮載祥就係前立法會秘書長。

Henry話呀，大約8、9歲嗰年，立法局搞記者同樂日，其中一個環節就係議員同記者嘅網球比賽，佢爸爸就帶咗佢同議員打番場友誼波，對手包括黃宜弘、吳亮星、霍震霆等前議員，聽到呢幾個名，感覺都夠晒懷舊。

唔好睇少Henry呀，佢自細已經由舅父教打波，所以球技有番咁上下。佢仲話最記得當時霍震霆絕無欺場，對住佢呢個小朋友都係盡全力咁打。至於賽果係乜？咁耐嘅事佢都唔記得喇。同好多小朋友一樣，Henry細個都有過做網球員嘅夢想，直至去到英國讀書，見識到呢個世界真係天外有天，先至決定都係專心讀書啦。

其實喺英國碧仙桃大學經濟及財務學學士畢業後，Henry先後喺廣告界同旅發局打工，去年先入廚房。今年一大喜事係年中會同女友拉埋天窗成為老襯，Henry話諗過仿效爸爸嘅做法，即係生番個小朋友，然後搵人教佢打波，等小朋友大個後變成自己嘅波友，事關佢怕自己教嘅時候會變咗嚴父喎！（八方反而好奇，乜做嚴父唔好咩？）

正因為細細個已經出入議會，到家陣做政助，經常要去立法會，有時會遇番一啲當年細細個已經認識嘅立會秘書處職員，佢話真係令佢既感動又感慨喎。

《蘋果》沙士15周年系列網站，正式登場：
https://hk.feature.appledaily.com/sars15