被網友封「燈神」嘅大埔LuLu(董嘉儀)噚日喺instagram貼咗張著咗一對AIRJORDAN系列球鞋嘅相，留言：「呢對都幾襯我呀!人生第一對AJ。」據知想當年Nike仲未係知名牌子，就搵咗MJ(MichaelJordan)做代言人，出咗呢個款嘅鞋，當時一年出一對，時至今日已經分家，JORDAN牌仍然一年出一對，網民見大埔LuLu晒對鞋咁開心，挑機問佢知唔知邊個係MJ?

大埔LuLu就喺instagram回覆：「我估就算火星人都會識MJ23係邊個？」跟住大埔LuLu疑似「wiki」完，佢留言：「6尺6。來自北卡。6隻指環，唔係會唔識呀嗎？定你想我簡介俾你識？」明寸留言質疑佢唔識嘢嘅網民。

不過識MJ嘅fans都會話佢嚟自公牛，好少人會話佢嚟自「北卡」，「北卡」應該係MJ讀嘅北卡羅萊納大學。

網民再睇Wiki發現裡面嘅資料同大埔LuLu寫嘅相似，懷疑有人唔識扮有料，留言寫「你知唔知邊個係MJ啊，人著你又著」、「即刻wiki咪識lor」、「其實唔識咪唔識，覺得靚咪著lor，但點解要wiki完扮晒識遮？正常一個90後未睇過MJ有幾奇⋯但扮識先X」。

大埔LuLu即反擊話：「點解連MJ都要話我唔識，唉！我冇睇過佢live，但都有YouTube，到今日大把人都講波神，識佢有幾奇，識MJ唔通係新聞嚟架咩？」即有人問佢：「一般球迷識MJ會話佢來自公牛，係啲扮晒資深嘅偽球迷先會來自北卡嘅！MJ喺北卡嘅YouTube你睇過幾多先？」

之後，大埔LuLu解釋：「其實果段對白來㗎，係嗰時我睇spacejam介紹MJ出場嘅對白，我就唔肯定有冇記錯，不過又唔洗wiki嘅，唔好係唔係開口埋口收X前收X後，唔係唔俾人憎我，但你嘅留言真係好煩，你唔顧你自己人格，都顧下其他人嘅眼睛啦!」

不過，大埔LuLu嘅instagram，仍然被網民狂插佢係「偽球迷」，仲有話佢平時講足球已經冇料，自稱係「巴神fans」，都唔知佢睇過幾場巴神踢嘅意甲，覺得佢根本唔識「籃球」嘅嘢。但其實人哋都係著咗對AJ鞋而已，咁都被喪插？