港鐵眾生相今次為大家介紹呢位自稱網紅嘅Ken哥，佢一身嘅打扮就好似漆黑中嘅螢火蟲咁出眾，黑白波點高帽、閃石大框黑超、大串金頸鏈，拖住一個有七彩閃燈嘅喇叭物體，胸口掛住LED牌，loop住網紅Ken哥幾隻字。上星期二（2日）夜晚7點幾，何小姐同細佬喺尖沙嘴站上荃灣綫列車，一上車已經俾Ken哥嘅造型吸引住，何小姐話佢全身好閃好似燈飾咁好矚目，唔少乘客嘅目光都不其然投放喺佢身上。

有位坐嘅Ken哥初時好心地，開住支無線金咪同企喺佢前面個小朋友講，「小朋友，車廂唔可以食嘢㗎」，但係個小朋友冇理佢，當時車廂都幾多人，Ken哥就繼續用咪自我介紹：「我係網紅Ken哥，不如我唱首歌畀你聽。」坐喺佢隔一個位嘅一個青年，唔滿意佢太嘈，於是開口叫佢靜啲，點知即刻撻着咗Ken哥，佢連珠炮發係咁爆粗鬧個青年：「唔X得呀，唔X講得嘢呀，X你老母……」青年應佢：「邊個叫你咁大聲呀，公眾地方呀！」

本來坐喺佢哋兩個中間嘅乘客嚇到走開咗。青年話Ken哥影響到全車人，一啲品德都冇，仲噴晒啲口水落佢度㖭。Ken哥繼續用粗口問候佢，鬧足兩個站，去到油麻地佢落車，何小姐同細佬都喺同站落車，見到Ken哥出咗月台仲回頭呼喝青年「出嚟吖」。何小姐認為個青年有正義感，但把聲就俾Ken哥蓋過晒。

港鐵回應話冇乘客投訴過呢件事，呼籲乘客要顧己及人，唔好喺車廂做出影響乘客嘅行為，如果有乘客覺得受到滋擾，可以即時通知車站職員跟進。至於有關行為有冇違反港鐵附例，要視乎實際情況。不過，港鐵附例第25條訂明，任何人唔可以喺列車上或鐵路處所任何部份，作出對其他乘客造成滋擾或煩擾嘅行為，違例者最多罰款5,000蚊；而第26條訂明，任何人唔可以喺鐵路處所任何部份，唱歌或跳舞或演奏任何樂器，違例者最多罰款2,000蚊。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568