31歲嘅o靚模郭穎兒（Celia K.）上月底剖腹誕下幼女Lia，出院回家時，從醫護人員手上抱回囡囡，卻發現囡囡右臉頰有一條又長又深血痕，遂向院方投訴，但院方堅稱非人為疏忽，係BB自己手甲抓傷。(新聞連結： https://bit.ly/2CgJ2K4 )

Celia肉赤囡囡「破相」，出現產後抑鬱情況，佢接咗Lia回家照顧，每天為佢臉傷搽藥，終於好番，日前仲同囡囡影咗初生相，Lia臉傷已痊癒，變番靚B。Celia今日接受《蘋果》電話訪問，佢話：「BB 依家過咗十二朝，佢臉上傷口差唔多好番晒，甩咗焦，但仲有條痕喺度，咁估遲啲會冇。」Celia補充：「每日仲有用人奶搽喺BB傷疤，希望個印快啲退。」

Celia話長女芯芯好錫妹妹，「家姐見到妹妹都好開心嘅，可能佢仲細，所以佢乜嘢都未識，淨係覺得屋企多咗一嚿嘢，成日都喊，冇乜呷醋，佢有時會摸吓BB。」Celia之前擔心Lia臉上血痕，情緒波動，佢話依家好啲：「最初有少少產後情緒，會有時唔開心喊，不過個個生完都有少少情緒影響，應該一個月就冇事，我有經驗，應OK。」Celia自嘲依家仲好肥，但比起產前係輕咗20磅，佢話仲有好多磅數要減：「卸咗貨，輕鬆咗。坐咗月先，食啲有營養嘢先。」

精選娛聞，喺晒《娛果》
http://fb.com/appledailyent