【樂評人之言】
日本殿堂級男星西城秀樹昨離世，商台DJ兼樂評人黃志淙昨日接受《蘋果》訪問，他嘆謂：「真係早咗啲！」黃大讚西城很勇猛，中風後仍努力操弗及開音樂會。黃表示：「紅白歌合戰係七十、八十年代農曆新年嘅盛事，年初一起身就睇，我同屋企人都係支持白組，除咗佢仲有澤田研二、鄉裕美，但西城高大英俊、長髮型仔，比起鄉裕美就成熟美啲，全家大細都好鍾意佢。」

談到西城秀樹對香港樂壇有何影響，黃志淙說：「西城秀樹喺舞台同音樂嘅影響力係佢嘅能量，佢跳紮紮好陽光，膚色、打扮日本得嚟又好美國，佢亦好聰明選咗《YMCA》呢首Village People嘅大熱歌改編，加埋動作舞蹈係席捲世界，對梅艷芳、羅文嘅影響都好深遠。」
演唱會文化方面，黃志淙憶述早年做資料搜集的資料，指當年周梁淑怡有一間製作公司，是做由日本引進來港的舞台燈音效果，而他亦是從西城的演唱會得到啟發，所以想請日本的製作人來港，亦因有這些高水準音樂會，令香港有上進心的搞手去日本取經，提升香港製作水平。
■記者沈寶茜