臨近年尾，唔少企業都會進行投票調查，總結年度消費者嘅意見。而韓國廣播廣告振興公社(KOBACO)今日喺網上公開「2017消費者形態調查」(MCR, Media&Consumer Research)嘅結果，公佈「年度最受消費者喜歡嘅廣告模特兒」。

男星宋仲基去年憑神劇《太陽的後裔》升呢做男神，更於去年MCR調查中獲選為冠軍，不過今年宋仲基就以6.5%得票率跌落第二位，憑《鬼怪》而大受歡迎嘅孔劉就憑6.7%得票率成為今年最受消費者喜歡嘅廣告模特兒。而女團AOA人氣成員雪炫亦由去年嘅亞軍，跌至今年嘅季軍，其得票率為5.6%，其後依次為全智賢(4.7%)、朴寶劍(4.6%)、秀智(4.2%)、劉在錫(3.8%)、宋慧喬(3.1%)、金妍兒(2.8%)及朴寶英(2.0%)。

另外，韓國首爾大學醫大聯同韓國消費者聯盟透過調查機構World Research Center，向1,200名國民進行民意調查，得出「最具好感度嘅健康社會貢獻宣傳大使」嘅韓星排行榜。

男星方面，宋仲基以6.4%得票率撼贏「國民MC」劉在錫(5.6%)，而於今年MCR調查成為冠軍嘅孔劉就排第三名，其後依次為朴寶劍、姜虎東、車仁表、池晟及金秀賢；至於女星方面，金妍兒就憑6.1%得票率成為冠軍，今年做人妻嘅宋慧喬及金泰希就分別以5.4%及4.7%成為第2、第3名，而金惠秀、李英愛、秀智、朴寶英、李寶英、高斗心及女歌手IU依次排名第4至10位。

更多韓流，喺晒《娛果》
http://fb.com/appledailyent