農曆新年就快到，啲AV、電腦產品都大劈價清貨，益咗我哋啲AV男執吓平貨。好似購物網生活易（ESDlife）都搞咗個第二屆網上電腦節，想食住早前深水埗電腦節嘅氣勢，大玩一蚊貨品大平賣。搞手Winky同小藍講話，網上電腦節由即日起到25日止，每日都有唔同嘅一蚊貨品，每日限售20件，好似周一賣原價79蚊有線光學滑鼠、周二賣webcam，今日就一蚊賣讀卡器。

150款產品超低價

Winky又話，除咗一蚊貨品，仲有150款產品以超低價發售，包括電腦數碼產品、藍牙耳機、薄屏電視機等，部份喺指定日子發售，詳情上佢哋嘅網（shop.esdlife.com）睇。小藍即刻上佢哋嘅網昅昅，限今日售賣嘅筍盤有TOPCONPro42吋TV428J全高清液晶電視，原價8,999元，賣6,999元，減價22%，仲送機頂盒。下周一限售嘅筍盤有BenQE2200HD22吋闊屏幕顯示屏，賣1,599元。仲有ASUSEeePC900Linux筆記簿型電腦，賣2,280元，送8GBSDHC卡。
其他冇限日子購買嘅產品都有兩、三成減幅，好似Olevia26吋LCD，雖然唔係全高清，但唔使3,000蚊，擺喺房都幾好，仲有100蚊百佳禮券送；BenQ37吋全高清LCD賣5,999元，送200蚊超巿禮券。不過，作為精明消費者，睇啱model都要走去街舖格價，費事買咗貴貨。
逢周五刊出