蘇格蘭女國務大臣海倫．李道爾（HelenLiddell）來港推銷蘇格蘭，昨日在老布殊訪港都幫襯的Morton'sofChicago扒房午宴，八方都去湊吓熱鬧。
呢位大臣，唔太hardsell，諗到用「蘇格蘭之友」來包裝。點先算「蘇格蘭之友」？只要有生意來往、曾在該地讀書、甚至飲過蘇格蘭威士忌，都係自己友。原來大臣星期一已經單獨見過兩位超級「蘇格蘭之友」──誠哥同小超人Victor。
點解是超人父子？如果讀者心水清，應該記得誠哥高價投得英國3G牌，據點就在蘇格蘭的格拉斯哥。國務大臣話前日上到和黃，誠哥好好招呼，海倫重話覺得誠哥好有魅力（charming）又謙遜（humble），而Victor就好熟悉蘇格蘭。如果誠哥去到蘇格蘭，順便買番條蘇格蘭裙着吓，呢張相就珍貴。
海倫同一日重見過煲呔曾，因為蘇格蘭同香港有啲似，都於近兩年經歷憲法轉變，有自己的議會和自治政府，兩人分享平穩過渡的經驗。不過人哋蘇格蘭就係全民直選，香港第二任行政長官則就快自動連任。


E-mail：[email protected]