永利街忽然獲得保育，其實中西區仲有幢建築物唔拆得，呢幢嘢位於西環，唔係中聯辦，不過仲勁過中聯辦，好多家陣位居第二權力核心要職、叱咤政壇人物都係出身此處，係孕育好多根正苗紅政治人物嘅搖籃，邊處咁巴閉？就係西環青蓮臺漢華中學舊校舍。
漢華幾年前獲批地小西灣興建新校舍，青蓮臺舊校舍早前由港大斥資6,000萬元買入，計劃改建為有140間房嘅研究生宿舍，不過屋宇署指改建宿舍要大幅降低地積比率，即係要拆卸大部份現時建築物先符合法例規定，與其搞到咁複雜，當局建議港大拆卸漢華舊校舍，重新興建新宿舍更好。
拆校消息一出震撼西環，區議員陳特楚反對，佢指漢華喺西區作育英才幾十年，好多街坊都係校友，既然大會堂係古蹟、永利街可以保留，「漢華同社區有深厚感情，點解要拆？」中西區區議員兼漢華舊生陳學鋒稱，校友會會搞簽名運動要求活化保育舊校舍。

學生幫手搬沙石助建校

漢華係知名愛國學校，據講當年有教師係地下黨員，會吸納「先進」學生入黨，因此在港英時代備受打壓，曾經俾教育司威脅取消註冊，前校長黃建立67年身兼「教育界鬥委會」主任，曾被殖民地警察「綁架」扣查，警方又在校內搜獲武器，係真正「起義」基地。回歸後人民當家作主大翻身，漢華變成直資名校，小西灣新校前年落成啟用，港英餘孽煲呔都要畀面去揭幕。
漢華初期冇獨立校舍，喺山道一舊樓辦學，63年樓下士多大火波及漢華，事後校方籌款百幾萬元於64年買下青蓮臺地皮興建新校舍，一年後新校舍火速落成。葉國謙同八方講，當年佢同好多同學都有幫手搬泥頭沙石協助施工，所以對舊校舍一磚一瓦都好有感情，希望屋宇署彈性處理，「最好唔好拆啦。」
創校65年嘅漢華知名校友包括中聯辦主任助理王如登、民建聯副主席葉國謙，一鳴驚人嘅陳克勤，亦係漢華出品，疑似黨員、特首人選梁振英係校董，咁多話得事嘅人都唔想漢華被拆，漢華要繼續屹立青蓮臺，誰敢說不？

mailto:[email protected]