「當你回首往事時，不因碌碌無能而悔恨，不為虛度年華而羞恥，咁你就可以好驕傲同自己講：你無負此生！」楚原喺金像獎上呢番說話，為人津津樂道。頒獎禮過後，唔少傳媒都力邀楚原叔出山做專訪，但楚原叔言明已退休，唔再受訪，不過今日喺一個攝影品牌嘅短片中就發現咗楚原叔嘅身影！

呢段長一分鐘嘅短片，全程由楚原叔自白：「我係楚原，今年八十五歲，我有一個好精采嘅人生，人生呢份劇本，出場有時、入場有時、歡喜有時、愁悶有時。時光飛逝，轉瞬暮年，唔好等到兩鬢星星如我、滿眼黃葉秋風，先至去珍惜人生啊！你應該早啲隨心而活，享受人生。留住最美嘅人生，最好係一幅相，一張可以勾起回憶，令你人生回味無窮嘅相。」

楚原叔今晚接受《蘋果》訪問，講到呢條短片，佢中氣十足話：「係咩？我都未睇過喎，都冇乜點解，佢哋叫到咪拍囉，嗰啲內容係我自己講。」好難搵到你出口喎，楚原叔笑笑口話：「都唔係嘅，都冇乜所謂，不過我都未見過，等我老婆返嚟叫佢開俾我睇。」

之後仲會唔會再拍？楚原叔就話：「我都唔知㗎，其實我都好唔鍾意做呢件事，不過今次幾鍾意嗰樣嘢，所以咪做，如果有鍾意咪再拍囉！」至於近期身體狀況，楚原叔就話：「Very good ！」

據知今次楚原之所以答允演出，原來係廣告公司動之以情，同錢係冇關，因為楚原叔本身又冇經理人，佢哋知道佢喺邊棟大廈住，於是一直寫好多信俾楚原叔，又成日上去同佢傾偈，最後促成呢個合作。

精選娛聞，喺晒《娛果》
http://fb.com/appledailyent