當年今日
關於我們

嫁嫁嫁吧2:貨車幸福到會

蘋果日報 2013/01/19 00:00


我說E2版的Fanny金光閃閃走過廟街露天大牌檔,惹來街坊跑來道賀合照者眾;娘親聞言冷笑:「你無睇粵語長片咩?我哋舊時喺天台搭個棚擺酒叫到會,望落樓下街燈仲閃仲好睇呀!成個炭爐搬上樓煮,幾十蚊圍,食到幾飽呀……」到會擺酒,幸福隨貨車送上天台,俱往矣。
記者:陳慧敏 攝影:劉永發、陳慧敏
廿元吃齊九大簋
1948年,「大來筵席」及「東南筵席」一起開業,1972年,兩者合併成「大來東南筵席」,每逢大好吉日,四五層樓高的大廈天台都會掛起串串燈泡,老廚師們執起鑊鏟,服侍出席喜宴、滿月、大壽等親朋戚友的胃袋。由19歲做到今日73歲的第二任掌舵人陳倫回憶:「嗰時啲人興租會堂、『紅樓酒店』、深水埗旅店或者幼稚園嘅天台擺酒席,最平二三十蚊已經有一圍,嗰陣啲大廈無𨋢㗎,我哋就揹晒啲四呎半摺得埋嘅枱呀凳呀、炭爐風爐呀搬上六七層樓,一齊架生就煮嘢食㗎喇。五十至七十年代,嗰陣都無話僭建唔僭建嘅,係十幾年前多咗消防條例先話唔得之嘛,到七十年代開始式微喇,碧街、上海街、金巴利街一帶啲舊樓拆晒,就無得做喇。」
四五十年代的喜宴,五十元已經有一圍燕窩魚翅席,1965年最平一圍翅席$55,細碗確實細碗了點,但用的全部都是真翅,乾鮑宴就每圍約$80,最平二三十元已經可以吃到九大簋,超簡單,極豐盛。九大簋的「九大」即是「九碗」,得包括風、雲、 雷、雨、海、火、水、地與天,名堂多多,即是吃甚麼?陳倫:「大騸雞牛白腩啦!大騸雞即係閹割咗嘅公雞,雞身大隻啲,肉又脆啲,好味過𠵱家啲雞好多!牛白腩咪即係牛腩囉,仲有茄汁蝦、扣肉、燒肉、炒珍肝、排骨、雞鵝鴨、冬菇蠔豉咁囉,一次過上枱,廚房煮埋一大煲,唔夠食再添。五六十年代,結婚酒席多數都係擺十圍八圍㗎咋,嗰陣時啲有錢佬,即係又一村嗰啲高尚住宅區嘅有錢人家,屋企多數有走馬騎樓,喺騎樓擺一圍,屋企裏面再擺四五圍枱就叫喜宴㗎啦。」
今日,不論有無家底的新人們,都渴望在五星級酒店擺酒,好歹可以風光一回,歷經半世紀的到會筵席店,執剩「大來東南筵席」這一家。以為他們很失落?不,為友情,為消閒,他們一班老夥計還好好火,轉型做專為老人家辦的大型盆菜宴。2010年,他們接過粉嶺十年一度的太平清醮宴席,一吃就是四日,共計四百多圍,總共六十個夥計全情投入都做到一頭煙;早幾日,又曾為老人家做過一百三十二圍盆菜,那不是要煮好幾天?陳倫:「唏,容乜易呀!我哋一早七點開始預備,一個鑊放十幾隻雞入去咪得囉!八九點開始分餸,舖頭好似打仗咁㗎。」
櫃枱上大大叠的菜單,統統都是毛筆手寫的,陳倫:「唏!寫咗幾十年,張菜單紙嘅設計1948年用到𠵱家,好多電視台嘅人都嚟問我借傢俬呀、杯碟呀、風爐呀去拍戲㗎,我哋本身已經係油麻地文物之一啦,一開始個舖開喺廟街七十八號,之後搬去上海街東南樓,再之後搬去砵蘭街六號,旺角或廟街一帶嘅婆婆都食過晒我哋啲嘢㗎啦。有人話我知旺角有商場某古物店賣我嘅舊菜單,仲叫我去收版權費㖭。」
empty
五十年代最實惠婚宴,一桌九隻公雞碗擺「九大簋」。
empty
五十年代酒席用的翅碗及骨碟,現只餘下數隻了。
empty
現今想辦到會喜宴,就只「大來東南筵席」一家。
empty
1958年,九龍總商會會長謝伯昌贈給陳倫的「膾炙人口」字畫。
empty
2010年粉嶺圍辦太平清醮盆菜宴,四百圍吃足三日,事後獲頒錦旗表揚。
empty
姚樂怡去年在圍村辦喜宴,也是擺到會盆菜宴,全村人前來道賀,非常熱鬧。
empty
今日除圍村外,沒多少人會再辦到會婚宴了。
empty
懷舊菜單,看得出當年人人都寫得一手秀氣毛筆字。
empty
一百三十二圍盆菜,千多張嘴等開飯,望見都驚。
empty
為預備一百三十二盆切雞烤肉,陳伯得晨早四點起床開始打點。
empty
這是梁伯,幫陳倫做了近三十年臨時傳菜員。
empty
夥計們穿白恤衫打煲呔,送菜時腰板挺直,好有大酒樓功架。
empty
爐頭搬到宴會場地,務求為賓客送上最熱的餸菜。
大來東南筵席
(2780 3145)
油麻地廣東道844號永發樓地舖
鮑參翅肚每圍$164
天台盛宴在七十年代沒落,大家轉到有瓦遮頭的酒樓酒店辦婚宴,民間博物館「慶禮院製作室」主持人李守政曾舉辦 《百年·好合──香港婚嫁百年》展覽會,以他家親友留下的婚宴相片、信物及歷年收藏品,以人物故事形式介紹香港婚嫁史的演變。2008年他結婚了,連自己這段2000年代的婚嫁史,都加入了藏品系列。
李守政父母於1968年在銅鑼灣地標「紅寶石酒樓」擺六十九圍鮑參翅肚宴,每圍$164,對比起「大來東南筵席」的每圍約$80,顯得好高貴。李守政:「我老竇有好多朋友,你睇佢哋張簽名布就知,當時都係朋友夾錢幫佢哋擺酒。酒樓會送套碗碟畀新人,又會送兩封利是,利是裏面有兩個一毫子,應該係成雙成對嘅意思。」早陣子他還在薄扶林村朋友的舊石屋裏,搜到雙喜青花碗、一幅「鸞鳳和鳴」掛畫、一雙對聯及一雙已風化得一碰即碎的油紙傘,展館擺放着的幾個藤籃子皆寫着大大個「囍」字,大抵都是戰前文物,李守政指着它:「呢個藤籃我都有一對,以前啲人將藤籃放喺祠堂,邊家要用就去祠堂借,係公家嘅。」
從搜集父母及親友婚嫁故事的過程中,本來就重情的李守政有更多更多的感動:「好記得細個嗰陣若果有人結婚,街坊街里都好守望相助,每家人都會幫手,感覺人同人之間嘅關係比現在更親切。我睇番家族結婚史,發現家族中人都無離婚問題,因為佢哋根本無諗過離婚,所以一路都好開心咁生活,白頭到老真係唔容易。」感動,於是到他2008年結婚時,就專誠製作小書送給賓客當回禮,書裏有他跟太太在舊唐樓拍攝的婚紗照、訪問,還有親朋戚友給他的祝福:「我覺得用好多精神去做一個婚禮,其實係兩個人一個好重要嘅經歷,日後諗番呢個過程,你會覺得好深刻。」
empty
這裏還只是李守政的四分一收藏品,大部份婚禮用品都是他家親友們的收藏物。
empty
朋友向老婆婆收集回來的老藤籃(前),後被用碎木壓成的餅盒取代了。
empty
在薄扶林村找到的「鸞鳳和鳴」掛畫(右),還有已經嚴重風化的油紙傘,全都是舊日子的嫁娶禮物。
empty
在薄扶林村找到的「雙喜」青花碗。
empty
酒樓送給李爸媽的禮物,寓意雙雙對對,此習慣今日酒樓仍保留。
empty
當年爸爸的婚宴菜單,$164一圍鮑參翅肚,頗為豐盛。
empty
在薄扶林村裏找到的一對大餅籃,館裏只放其中一隻。
empty
爸媽結婚時朋友的簽名布,真是高朋滿座呢。
慶禮院製作室
(2881 6029)
地址:太古船塢里8號華廈工業大廈8A室