錢小豪、龐景峰等人今日喺紅磡出席拳賽記者會，兩父子早前喺網絡大電影《生化藥屍》合作，龐景峰笑言喺父親身上學到認真工作同守時嘅重要：「佢拍戲會早兩個鐘到片場，朝早八點集合，佢會五點鐘拍門叫我，我知道佢事前會好好準備，但差太多，有時都有啲壓力。」錢小豪指內地拍外景，有時廁所環境比殭屍更恐怖，所以早點準備又可熟讀劇本。

父子合作冇磨擦，反而開心相對，至於會否再合作，錢小豪指唔會用私人關係推薦兒子：「雖然我想佢學多啲野，多啲才華，但要導演OK我先會邀請佢，唔會因為係阿仔先叫佢做。」小豪表示呢套網絡大電影反應理想，一星期有千萬點擊，香港會有院線上映，8月尾會舉行慈善首映。