吳建豪老婆石善貞之前生日，但就冇提吳建豪，網民都問到底老公去咗邊，其實佢唔係潛水，只係喺香港趕拍由黃永峰監製、呂冠南和譚廣源執導、斥資三千萬新戲《潛龍狙擊》(唔係大台乜乜狙擊系列)。

呢部戲係由吳建豪、安志杰同伍允龍三位猛男孭飛，伍允龍仲兼任動作導演。吳建豪呢部戲博到盡，所有危險動作乎大部份都親身上陣，今日佢就喺葵涌貨櫃碼頭，同大馬演員AaronAziz有連場對打。

劇情交代Aaron係壞蛋，而吳建豪就出手收服佢，今日仲出動蝴蝶刀，將Aaron打個落花流水。今日中午最高氣溫有成攝氏34度，仲要外景打戲，苦不堪言，幸而現場不少工作人員貼身照顧吳建豪；吳建豪都好識做，中午3點3「萬歲」請劇組食糖水同生果消暑。見其心情好似冇乜嘢，笑笑口咁，但工作人員一早講明唔准問感情問題，問咗都係唔會答。

休息期間，吳建豪手執蝴蝶刀係咁轉，手勢俐落，拍攝時出手嘅動作都快夾準，好快就將身形大佢半個碼嘅Aaron打倒。

除咗出刀，吳建豪仲起埋飛腳，直勁快，仲狠，連一早安排俾佢嘅替身都唔使，導演譚廣源大讚：「吳建豪做嘅動作比替身仲要好，咁我哋當然要用佢嘅片，以後搵佢拍戲，真係可以慳番替身錢。」呂冠南就爆料話吳建豪喺戲中除咗打戲，仲會有搞笑部份。