新城市戰場於714後，全港狠批新地（016）「引清兵入關」，姑勿論新地所謂「冇報警」說法孰真孰假，但觀乎新地公關處理手法，以一間市值達3940億元的上市公司而言，可以說是嘆．為．觀．止！

7月14日，市民、克警血濺新城市，當晚已有片段證職員殷勤接待防暴警，可說是「斷正」。不過新地方面，有如港府及警方，一味玩FB出Post，左一句「沒有報警」、右一句「24小時公共通道」。

足足兩日時間，新地對事件近乎零回應！要至昨日過百市民包圍新城市廣場詢問處，新地及旗下物管公司啟勝，才再搞閉門記招。

點解唔第二日就開記招澄清，將過程清清楚楚交代，反而任由輿論發酵？反應慢的程度比得上林鄭。

新地今次的應變，反映高層停留於遠古時代，未能與時並進，錯估形勢。一副「你奈得我咩何？我係唔應你，睇死你班香港人過多幾日就唔記得。」以為自己是大地產商就大晒？

林鄭「珠玉在前」，有辦你睇：真係千萬唔好睇死香港人嘅決心。香港警民關係早已撕裂至無可挽救絕地，此時新地成為大眾的「吳三桂」，引清兵入關，你還以為事件可以側側膊唔多覺？

當然，你可以說，「我又唔係靠你香港人搵食，商場我有大陸客，有樓買你唔通唔買咩？」不過，新地越不回應，以現時有網絡的動員能力，要隨時搞「超合作運動」又有何難？

香港人，特別是年輕人，從來都是受軟唔受硬；要化解危機，永遠都是誠意行先。出事三日，高層慢十拍，商場出大事，鞠躬道歉合理不過，但新地先不聞不問，然後一個轉身搞閉門記者會，聲明No video shooting and no live，事後草草用文字表示「深表歉意」。這到底是甚麼年代的公關思維？

新地，你有冇良心！明知星期二過百名市民包圍詢問處，竟然只派出幾個詢問處小職員應付？仲有幾個係只係Trainee？然後事後表示「認為前線員工絕對有能力處理事件」？新地貴為香港四大地產商之一，竟然於此轟動國際的事件後，爆發極嚴重的公關災難，而事後高層竟全部龜縮，只派出前線做爛頭卒？

要了解時局，或許新地各高層，在搞「山頭主義」式內鬥外，還需多上連登，玩玩IG，學識用Telegram，了解一下現代世界。

按：事實上，雖然新城市弄至如此景況，商戶可說是冇仇報，因為一般商場保險不包示威遊行所造成的破壞；另外，如果商場自行關門或店舖自己關門，保險也不包損失。
另，新地股價事後冇影響，股價輕微連升三日。

by千頌C@堆填區
http://fb.com/winbigwok
-----------------------------
【每周送10萬】
升級壹會員獨家尊享，立即參加10萬火急大抽獎 !
*推廣生意的競賽牌照號碼：52302-9