基金換馬，威力唔係嘢小，去年備受追捧的汽車股、內需股，今年一開始便風光不再，中國動向（3818）、李寧（2331）、吉利汽車（175）與海爾電器（1169）等的去年明星股，近日上升乏力，相反，去年大跌股如中交建（1800）、中通信（552）扭轉劣勢，昨日出現報復性升勢，不過呢類重磅股升得一日好快有炒家獲利沽貨，等回吐至慢慢買未遲。
另一類今年主題係通脹，食品與能源唔少得，本周農業與能源股升到你唔信，事實上油價已連升多日，油股與煤股卻是剛剛熱身，應仲會有排升。煤股當中，恒鼎實業（1393）股價往績表現最有爆發力，其股價由去年3月中的2元水平，一直升至7月近9.50元，升幅以數倍計，同期中煤能源（1898）升幅一倍都唔夠，中國神華（1088）則勉強有一倍升幅。