紅火蟻又嚟攻擊將軍澳？俾紅火蟻咬到可能會冇命，係人見到都驚，之前將軍澳區好幾次俾紅火蟻入侵，令居民聞風喪膽。有九巴站長星期二（26日）喺將軍澳醫院隔籬個坑口（北）巴士總站，突然見到好多堆紅色嘅昆蟲，懷疑係紅火蟻，嚇壞班站長同車長。姓梁車長同《蘋果》講，嗰日係有個站長首先發現巴士總站旁邊嘅大樹樹幹、花叢、同埋站長室更亭四周有一堆一堆紅色嘅昆蟲走嚟走去，數目估計有幾百隻，於是通知公司搞搞佢。

食環收集樣本鑑定

但《蘋果》睇過車長影啲相，隻昆蟲鮮紅色驟眼睇好似一粒粒紅石榴咁，唔係幾似紅火蟻，於是請教專家。香港蟲害控制從業員協會會長梁廣源同香港殺蟲業協會會長蔡炳然，都異口同聲話肯定唔係紅火蟻，估計係植物性昆蟲，以植物為食糧。綜合專家嘅估計，相信係俗稱「樁象」嘅半翅目昆蟲。陸生樁象一般身上都有「臭腺」，遇到危險時就會釋放一陣腥臭味趕走敵人，俗稱「臭蟲」，有肉食性同植食性兩種。
九巴發言人回覆《蘋果》話，已即時通知政府部門要求跟進，又話食環署今朝早會去巴士總站滅蟲。食環署就話派咗人收集嗰隻昆蟲嘅樣本畀專家鑑定，等緊結果。