「#Metoo」活動近日蔓延到韓國演藝圈，甚至有偶像成員捲入涉性騷擾事件。噚晚某論壇有人發文，直指過去曾遭偶像歌手A某性騷擾。

發貼人寫道：「依家Metoo運動如火如荼，我一直好困惑點解會冇出現過你個名。喺小學6年級要升上初一嘅冬天，喺長位洞嘅一間網吧，你話有嘢同我講要約我見面，我到達後你就帶我到洗手間，鎖上門扮同我講悄悄話卻舔我耳仔，甚至強吻我，你又威脅我如果我大聲叫或者逃走，就將事件傳出去，仲威脅我要傳裸照畀你，我實在太驚所以照做，同時懇求你唔同將事件傳出去。」

文章續指：「上咗高中後，聽講你出道做咗偶像我反而安心，因為考慮到你拎住我嘅裸照卻做唔到啲咩。當你爆出戀情及『分訊』時，我諗應該係你對該名運動選手女友同樣做過咁變態嘅事。而且我知除咗我之外，你亦曾對其他女仔咁樣做過。」目前呢篇貼文已經被刪除。

由於發文寫提到A某曾與運動選手交往並已經分手，令網民聯想到今日28歲生日嘅樂隊FT Island隊長崔鍾訓，崔鍾訓去年6月被爆撻着23歲前體操美女運動員孫延在，不過兩人公開戀情3個月後就分手。

另外，亦有人喺網上聲稱抒情組合嘅主音性騷擾，矛頭更直指男團2AM嘅主音昶旻，不過事後其事務所否認昶旻有涉性騷擾，同時亦有記者為昶旻澄清，強調主角並唔係2AM嘅昶旻。

更多韓流，喺晒《娛果》
http://fb.com/appledailyent