先不去嘗試如何可以更準確評估，二孩政策會帶來多少人口及勞動力。從市場推廣來說，的確會帶來很多商機。

這幾天，很多評論也說過對於奶粉、紙尿片、教育、醫療的需求有所增加。我推測，受影響的又豈止咁少？

此舉對於保險的需求也有一定程度的影響。教育保障從此double，父母儲蓄保障自然都要加碼、將來遺產承繼也要一開二。郭富城如再拍那個保險廣告，就要帶多件，踏上一個更「吃力」的單車之旅。

將來對於「空間」的需求也應大增。我的意思並不單指要買間大啲嘅屋，而是比較容易負擔的例如休憇設施、以至商場、主題樂園等，請作好準備！也可以考慮更多雙人及親子互動遊戲。

亦有聽聞就算開放生育政策，人家也冇諗住要生。如此一來，一廂情願，與政策無關。廣告創意要搞的，反而係點樣提高生兒育女的興趣及製造需求。今日中國並不需要靠多生而幫補家庭勞動力。要生，定必要抓緊營造四人家庭的優越感，又或者生多一個會帶嚟的長遠好處。唔係，睬你都儍！

BB會、奶粉會的CRM有大把嘢玩，做完阿哥之後可以做細佬妹。又可推出二孩加父母4D電影套票送爆谷、二孩睇煙花buffet及Halloween、聖誕餐、二孩同行第二名半價annualpass等等。花款數之不盡。

相反，你估有乜行業會帶來負面影響？避孕套的生意暫時可能就有啲愁。同時，此舉對於好多香港大眾市民亦未必咁歡迎。代表有更多小孩嚟爭奶粉，那些一天送貨承諾、365絕不缺貨推廣就可能冇咁易搞。第日過時過節，各大主題樂園、酒店食肆可能變得更墟冚。你鍾意與唔鍾意都好，反正他們也未必全部湧晒嚟香港。有見大陸家庭越來越富裕、對於教育及旅遊的眼界及要求也越高，去歐洲、美加可能是比香港更好的選擇。此改變最終帶來的影響，也是一個未知數。但雖不近亦不遠矣，有云2017第一個高峯期可能就會來臨！

文廸晞

掌握財經生活資訊，即Like「蘋果ATM」fb專頁啦！
http://fb.com/appledailyatm