依照天文台預測，周三晚（6日）有機會在天雨下作賽，正如之前提過，這個季尾跑馬撞正有雨落的日子比過往少，而對上一次谷草有同類環境，要數到5月9日，當晚由第五場開始持續有雨落，結果後四場前置馬匹有一定優勢，「追風追月」及今次又有份出賽的「幸運時代」均直領到底，再按今季谷草A欄大多有利內疊跑線，明晚賽前做功課，將前置馬提升評級比較化算。

明晚市場焦點，相信會是沒有了雷神的潘頓，不過會否換來座騎嚴重超買？大家真要諗諗。另邊廂，黃俊跑了兩次谷草尚未贏過，但今戰手執不少具分量的前置馬，加上跑道有機會放得快好世界，小伙子有望取得谷草零的突破，如有潘頓「大樹遮蔭」換來較佳分頭，不妨轉陣追黃俊。

第四場「永旺喜喜」上次配雷神出戰谷草1000米，頭場與多駒鬥燒末段仍有兩腳保住第三。黃俊目前最煞食之處，就是憑著本身檔子夠輕，就算座騎盡情狂放，拉士也較對手捱得，較早時騎「自由旺」於田草直路賽爆半冷便是，今次夥拍「永旺喜喜」僅以110磅迎敵，排11檔起步迫於盡搶，反可充分發揮騎者放紙鳶優勢。

黃俊另一苗廐座騎第五場「川河領駒」，上仗夥拍騎者轉用放頭跑法出戰谷草一哩，頭三段造1分16秒內超快步速也不過輸埋門幾步奪季，今次「川河領駒」由排10檔轉5檔，早段不用走得太急，有機會在黃俊胯下取得今季同程第二捷。